Կայացավ Հանրապետական եռակողմ հանձնաժողովի հերթական նիստը

Կայքի հին տարբերակը

Կայացավ Հանրապետական եռակողմ հանձնաժողովի հերթական նիստը

ՀՀ աշխատանքի և սոցիալական հարցերի նախարարությունում հուլիսի 31-ին կայացավ Հանրապետական եռակողմ հանձնաժողովի հերթական նիստը, որին մասնակցում էին Հայաստանի արհմիությունների կոնֆեդերացիայի, Հայաստանի գործատուների միության և ՀՀ կառավարության ներկայացուցիչներ:

Նիստում քննարկման էր դրված <Հայաստանի Հանրապետության գենդերային քաղաքականության իրականացման 2019-2023 թվականների ռազմավարությունը և միջոցառումների ծրագրի նախագիծը /զեկուցող Աշխատանքի և սոցիալական հարցերի նախարարության ընտանիքի, կանանց և երեխաների հիմնահարցերի վարչության առաջատար մասնագետ Ս. Բոստանջյան/, Հայաստանի Հանրապետությունում նվազագույն աշխատավարձի համահունչ մեծության գնահատման վերաբերյալ հետազոտության արդյունքերը /զեկուցող Աշխատանքի և սոցիալական հետազոտությունների ազգային ինստիտուտի տնօրեն Ա. Սարգսյան/, ԱՄԿ-ի մասնակցությամբ Հայաստանի գործատուների հանրապետական միության 10-րդ Ազգային կոնֆերանսի մասին /զեկուցող Հայաստանի գործատուների հանրապատեական միության նախագահ Գ. Մակարյան/ զեկույցները:

Նիստին մասնակցում էին հանձնաժողովի անդամներ՝ Հայաստանի արհմիությունների կոնֆեդերացիայի նախագահի տեղակալ Բ. Խարատյանը, ՀԱՄԿ-ի Հայաստանի առևտրի, հասարակական սննդի և սպառկոոպերացիայի և ձեռներեցության աշխատողների ՃՀՄ-ի նախագահ Շ. Մկրտչյանը, Հայաստանի արդյունաբերության աշխատողների ՃՀՄ-ի նախագահ Հ. Դանիելյանը, Հայաստանի մշակույթի աշխատողների ՃՀՄ-ի նախագահ Ժ. Թորոսյանը և ՀՀ պետհիմնարկների, ՏԻՄ-երի հասարակական սպասարկման աշխատողների ՃՀՄ-ի նախագահ Ա. Ասատրյանը:

Բ.Խարատյանը <Հայաստանի Հանրապետության գենդերային քաղաքականության իրականացման 2019-2023 թվականների ռազմավարությունը և միջոցառումների ծրագրի նախագծի վերաբերյալ առաջարկեց վերշարադրել ծրագրի Գենդերային խտրականության կանխարգելում բաժնի 5-րդ կետում նշված <սեռական տարբեր խմբերին պատկանող կանայք և աղջիկներ> ձևակերպումը:

Անդրադառնալով նվազագույն աշխատավարձի համահունչ մեծության գնահատման վերաբերյալ հետազոտության արդյունքներին պարոն Խարատյանը կարևորեց նվազագույն աշխատավարձի սահմանման համար անհրաժեշտ երկու գործոն՝ աշխատողի և նրա ընտանիքի անդամների պահանջմունքներն ու տնտեսական վիճակը, որոնք տեղ չեն գտել վերոհիշյալ վերլուծության մեջ: Մինչդեռ, ըստ Բ.Խարատյանի այս գործոններն անմիջական կապ ունեն կանանց խտրականության կանխարգելման հետ, այն պարզ պատճառով, որ Հայաստանի Հանրապետության տնտեսության մեջ կանայք գերակշիռ մաս են կազմում:

Նիստի ընթացքում Ա.Ասատրյանն անդրադարձավ վերջին տարիներին հանրապետության մարզերում որոշ պետական պաշտոնյաների կամ ՏԻՄ-երի դրդումներով արհմիությունների որչնչացման պրակտիկային և նշված պաշտոնյաների իրավական անգրագիտությանը և առաջարկեց կոնկրետ գործողություններ ձեռնարկել կառավարության ծրագրում տեղ գտած և վարչապետի կողմից հայտարարված արհմիությունների դերի բարձրացման անհրաժեշտության գաղափարը կյանքի կոչելու ուղղությամբ: Նա հանդես եկավ նաև Հոկտեմբերի 7-ի՝ Արժանապատիվ աշխատանքի օրվա առթիվ կոնֆերանս անցկացնելու առաջարկությամբ, ակնկալելով Հանրապետական եռակողմ հանձնաժողովի աջակցությունը:

Հանձնաժողովի անդամների կողմից օրակարգի թեմաների՝ մասնավորապես Գենդերային քաղաքականության իրականացման 2019-2023 թթ. Ռազմավարության և միջոցառումների ծրագրի շուրջ ծավալվող բուռն քննարկումների արդյունքում որոշվեց հանձնաժողովի անդամների կողմից մեկ շաբաթվա ընթացքում ներկայացնել նախագծերի վերաբերյալ գրավոր առաջարկություններ: