Էներգետիկան կզարգանա՞ առանց միջին օղակի մասնագետների
Հայաստանի Հանրապետության տնտեսության զարգացումը պաշտոնական վիճակագրական տվյալներով վերջին տարիներին մշտապես գտնվել է «վերելքի» ճանապարհին: Սակայն 2016թ. սեպտեմբերին պարզ դարձավ, որ տնտեսության վիճակը մեղմ ասած բավարար չէ և ինչ-որ տեղ մտահոգիչ է:
Եվ ահա այստեղ խնդիր դրվեց օպտիմալացնել ոլորտներ, առանձին կառույցներ և կազմակերպություններ միավորել, ոչ արդյունավետ գործունեություն ծավալող, սակայն պետբյուջեից սնվող ՊՈԱԿ-ները պարզապես փակել:
Գաղտնիք չէ, որ էներգետիկան ցանկացած տնտեսության զարգացման հիմքն է և մեր երկրում այն համարվում է առաջատար և շահութաբեր ոլորտ:
Բնականաբար, պետք է ենթադրել, որ ոլորտի աշխատանքի արդյունավետությունը մեծապես կախված է ոչ միայն հումքային պաշարներից, այլև առաջնային է մարդկային գործոնի դերը՝ մասնագետների որակավորումը տարբեր օղակներում և ստորաբաժանումներում:
Ոլորտի արդյունավետ աշխատանքի կազմակերպման գործում լուրջ անելիքներ ունեն ոչ միայն բարձրագույն կրթություն ստացած ինժեներական կադրերը, այլև միջին օղակի մասնագետները:
Ի դեպ, էներգետիկ ոլորտի միջին օղակի մասնագետներ պատրաստել է և պատրաստում է հանրապետությունում եզակի քոլեջ՝ Աբովյանի պետական էներգետիկական քոլեջը:
Այս քոլեջի ճակատագիրը մշուշոտ է, քանզի ԿԳՆ-ից ստացված 06.09.2017թ. թիվ 01/08.1/11987-17 գրության համաձայն վերը հիշատակված քոլեջը և Աբովյանի թիվ 1 արհեստագործական պետական ուսումնարանը միացման ձևով վերակազմավորվելու են իբրև «Աբովյանի պետական քոլեջ»:
Աբովյանի էներգետիկական քոլեջը շուտով կնշի իր գործունեության 50-ամյակը: Այս կոլեկտիվի ուժերով կրթվել և դաստիարակվել են մեծ թվով մասնագետներ, հատկապես էներգետիկայի բնագավառում:
2005թ. սկսած քոլեջը պայմանագրային հիմունքներով մասնագետներ է պատրաստել նաև գազի բնագավառի համար:
Այսօր մտահոգիչ է, որ էներգետիկայի ոլորտում միջին մասնագիտական պատրաստավածություն ունեցող կադրերի պատրաստման խնդիրը դրվում է օպտիմալացման հարթության վրա: Հանրապետությունում հումանիտար կրթությամբ մասնագետների պակաս չի զգացվում, սակայն ինժեներական և հատկապես միջին օղակի մասնագետների անհրաժեշտությունը արդիական է:
Կարծում եմ, Աբովյանի պետական էներգետիկական քոլեջի նկատմամբ պետք է դրսևորել ուշադիր վերաբերմունք և ընդհանուր օպտիմալացման խնդիրների շրջանակում դրսևորել առանձնահատուկ մոտեցում:
Էներգետիկ ոլորտում ցանկացած ներդրում իրականացնելու պայմաններում առանց միջին օղակի մասնագետների արդյունավետ աշխատանք դժվար է կանխատեսել:
Գառնիկ Վաղարշակյան
Հայաստանի բուհերի արհեստակցականկազմակերպությունների ճյուղային հանրապետականմիության նախագահ
Սկզբնաղբյուրը՝ www.lragir.am
ՍՈՑԻԱԼԱԿԱՆ ԳՈՐԾԸՆԿԵՐՆԵՐ
ՀՀ աշխատանքի եվ սոցիալական հարցերի նախարարություն
Հայաստանի Գործատուների Հանրապետական ՄիությունՄԻՋԱԶԳԱՅԻՆ ՀԱՄԱԳՈՐԾԱԿՑՈՒԹՅՈՒՆ
Արհմիությունների համընդհանուր կոնֆեդերացիա
Արհմիությունների միջազգային կոնֆեդերացիա
Աշխատանքի միջազգային կազմակերպություն
